විදුහල්පති පණිවිඩය
මෙදේරිපිටිය කනිෂ්ඨ විද්‍යාලය

සීඝ්‍රයෙන් වෙනස්වීම්වලට ලක්වන සහ ලෝකයට සාර්ථකව එක් විය හැකි, පුරවැසියෙකු බිහි කරලීමේ වගකීම ශ්‍රී ලංකාවේ අධ්‍යාප වෙත පැවරී ඇති උදාර කාර්යභාරයකි. ඒ අනුව විසි එක්වන සියවසට ගැලපෙන දැනුම කුසලතා ආකල්ප වලින් පිරිපුන් සිසු පරපුරක් සමාජගත කිරීමේ අතිවිශාල වගකීම පාසල වෙත පැවරී ඇත.

වසර 101 ක අභිමානවත් ඉතිහාසයකට නෑකම් කියන මෙම විද්‍යාලය එහි වගකීම නොපිරිහෙළා ඉටු කර ඇති බව මාගේ හැඟීමයි. ඉදිරියේදීද එය එසේම සිදු වනු ඇත. විද්‍යාලයේ උන්නතිය වෙනුවෙන් එදා මෙදාතුර කැප වූ ගුරුභවතුන්, සිසුන්, දෙමාපියන්, ආදි සිසුන් ඇතුළු පාසල් ප්‍රජාව කෘතවේදීව සිහිපත් කරන අතර, වර්තමානයේ දී පාසල නගා සිටුවීමට ගුණගරුක සිසු කැලක් සමාජයට දායාද කිරීමට, වෙර දරන ගුරුභවතුන්ට, සහයෝගය දක්වන දෙමව්පියන්ට, ආදි සිසුන්ට, අනධ්‍යන කාර්ය මණ්ඩලයට හා සමස්ත පාසල් ප්‍රජාවටතම උපරිම දායකත්වය, කැපවීම පාසල වෙනුවෙන් ලබා දීමට අවශ්‍ය ශක්තිය ධෛර්යය ලැබේවායි ප්‍රාර්ථනා කරමින් පාසලේ උන්නතිය වෙනුවෙන් සුභාශිංසන එක් කරමි.