නියෝජ්‍ය විදුහල්පති පණිවිඩය

විද්‍යාලයට වසර එකසිය දෙකක් සැපිරෙන මොහොතේ පාසල වෙනුවෙන් වෙබ් අඩවියක් නිර්මාණය වීම ඉතා සතුටුදායක කරුණකි.  එමෙන්ම පාසල සඳහා නිර්මාණය වන පළමු වෙබ් අඩවිය සඳහා මූලිකත්වය ගෙන කටයුතු කිරීමට ලැබීම, පාසලේ තොරතුරු තාක්ෂණ විෂයභාර ගුරුවරයා ලෙස මා ලද භාග්‍යයකි.

වසර 12 කට ආසන්න කාලයක් පාසලේ සිප් සතර හැදෑරූ දූදරුවන්ගේ තාක්ෂණික දැනුම ඉහළට ඔසවා තැබීමට ගත් උත්සාහයේ එක් කඩඉමක් ලෙස මෙය සැලකිය හැකිය. ග්‍රාමීය පරිසරයක පිහිටි, ලෝක උරුම සිංහරාජ වනාන්තරයට මායිම්ව ඇති, ගැමි සුවද තවමත් නොගිලීගිය මිනිසුන්ගේ මල් කැකුලුවන් දරු පැටවුන් හට ශත වර්ෂයකට  අධික කාලයක් සිප් කිරි පෙවූ ඒ විඳු බිම මාර/ මෙදේරිපිටිය කණිෂ්ඨ විද්‍යාලයයි.

එදා සිට දුෂ්කර යයි සලකනමුත්, තම පත්වීම රැගෙන එය ගුරුභවතුන් ඉතා තෘප්තිමත් සේවා කාලයක් තම ගුරු දිවිය තුළ ගතකරන, සොඳුරු මතකයන් හා ළෙන්ගතු සහෝදර බැඳීම් ඉතිරි කර, දුප්පත් දුවා දරුවන් ඉහලට ඔසවා තැබීමට අසීමාන්තිකව තම කාලය, ශ්‍රමය, මුදල් වැය කළ හා තවමත් වැය කරන, ජවසම්පන්න හා ධෛර්යවන්න ආදරණීය ගුරු මඩුල්ලක් සිටින විදු බිම මෙදේරිපිටිය කනිටු විදුහලයි.

ඉදිරියටත්, තවත් බොහෝ කාලයක් ප්‍රදේශයේ දූදරුවන් හට සිප් සතර ලබාදීමට අප විදුහල් මාතාවට හැකිවේවායි මේ අවස්ථාවේ සුභාශිංෂණ ගෙන එමි. එමෙන්ම මෙම කර්තව්‍ය සාර්ථක කර ගැනීම සඳහා උරදුන් සැමට මාගේ හෘදයාංගම ස්තූතිය පිරිනමන අතර දරු දැරියන්ගේ යහගුණ මෙන්ම අධ්‍යාපන කටයුතු දිනෙන් දින වර්ධනය වේවා යි ප්‍රාර්ථනා කරමි.

         නියෝජ්‍ය විදුහල්පති,       

            මෙදේරිපිටිය කනිෂ්ඨ විද්‍යාලය